• الرئيسية
• كورة مصرية

خرج أحمد سيد "زيزو"، نجم نادي الزمالك، عن صمته ليحسم الجدل الدائر حول مستقبله مع القلعة البيضاء، مؤكدًا عدم توقيعه لأي نادٍ سواء داخل مصر أو خارجها، وموجهًا رسالة واضحة لإدارة النادي بشأن تجديد عقده.

وقال زيزو في بيان رسمي عبر حساباته على مواقع التواصل الاجتماعي:

"أنا راجل بحترم كل الناس، لكن التزامي وصمتي عن الرد على المعلومات المغلوطة خلّى كل شوية يطلع خبر عن توقيعي أو تجديدي، وكل طرف بيغازل جمهوره بخبر رايح وجاي. بكل وضوح: أنا لم أوقّع لأي نادٍ داخل أو خارج مصر. واللي حصل على توقيعي يتفضل يعلن لو كلامه صح. واللي عنده دليل يطلعه على الملأ."

وأكد زيزو تقديره الكامل لنادي الزمالك، مضيفًا: "أنا بقدّر جدًا الكيان الكبير اللي بلعب فيه، ومش ممكن أنكر فضله عليا. لكن للأسف، محدش حب يتكلم عن حقوقي زي ما بيتكلموا عن التجديد. محدش سأل ليه النادي سايبني بقاله شهور ومش عايز يجدد؟ ليه محدش اتكلم عن المستحقات المتأخرة اللي ليا من فترة ومفيش حد بيرد عليا؟"

وتابع: "أنا لعيب كورة، وعمري مش كبير في الملاعب، وعندي التزامات وأسرة زي أي حد. ربنا أنعم عليا بعروض مالية قيمتها 5 أضعاف العرض المقدم ليا، ومع ذلك أنا منتظر رد رسمي من النادي. وده مش لتجميل الصورة، لكن لأن في اعتبارات كتير بتحكمني."

وشدّد زيزو على أنه لا يزايد أو يتاجر بالقضية، قائلًا: "أنا مش بزايد ولا بتاجر، لكن لازم الطرف التاني يكون عايزني أكمل، ويكون في استجابة حتى لربع العروض اللي عندي. للأسف الكلام معايا حاجة، واللي بيتقال في الإعلام حاجة تانية."

واختتم نجم الزمالك رسالته قائلًا:

"أنا مستني رد النادي لحد آخر يوم في الكونفدرالية، وأتمنى ربنا يكرمنا بالبطولة أنا وزمايلي. وأي كلام عن التجديد أو التوقيع قبل كده، فهو غير صحيح. وأتمنى إن الحوار في مسألة تجديد العقد يكون بيني وبين إدارة النادي مباشرة، مش عن طريق الإعلام. أنا كنت واضح جدًا في كل نقطة اتكلمت فيها، ودي أمور عادلة تساعدنا على الاستمرار سويًا. شكرًا على تفهمكم."